ENDURREISNIN

Endurreisnin

Pétur postuli spáði fyrir um þann tíma „þegar Guð endurreisir alla hluti“ fyrir síðari komu Krists (Postulasagan 3:19–21). Úr því allt hafði glatast í fráhvarfinu var nauðsynlegt að endurreisa á jörðu kirkju Krists ásamt valdsumboði hennar. Endurreisnin var gerð til að gera öllum kleift að hljóta blessanir fagnaðarerindis Jesú Krists að nýju.

Endurreisn fagnaðarerindis Jesú Krists á jörðu hófst með fyrstu sýn Josephs Smith. Á næstu árum endurreisti Kristur prestdæmið og stofnaði kirkju sína. Hann opinberar stöðugt spámönnum sínum sannleika og endurreisir blessanir sem um tíma voru teknar af jörðunni.

Endurreisn prestdæmisins

Guð hefur á öllum tímum veitt þjónum sínum spámönnunum valdsumboð til að starfa í hans nafni. Valdsumboð þetta nefnist prestdæmi. Jesús Kristur veitti upprunalegu postulunum tólf prestdæmið og þeir voru leiðandi í starfi kirkjunnar eftir uppstigningu Jesú til himins. En eftir að postularnir höfðu verið drepnir, hvarf prestdæmið smám saman af jörðu.

Joseph Smith var árið 1829 veitt prestdæmisvaldið til að stofna kirkju Krists. Árið 1830 var sama kirkja Jesú Krists og verið hafði uppi fyrir mörgum öldum endurreist á jörðu. 

Prestdæmið er tvíþætt. Lægra prestdæmið nefnist „Aronsprestdæmið“ eftir Aron í Gamla testamentinu. Því fylgir valdsumboð til að boða fagnaðarerindi iðrunar og að skíra. Æðra prestdæmið nefnist „Melkísedeksprestdæmið“ eftir Melkísedek í Gamla testamentinu. Því fylgir valdsumboð til að stjórna kirkjunni og framkvæma allar heilgiathafnir, ásamt því að veita gjöf heilags anda. 

Valdsumboð til að skíra

Þegar Joseph Smith þýddi Mormónsbók, lásu hann og vinur hans Oliver Cowdery orð Jesú Krists um niðurdýfingarskírn til fyrirgefningar synda (Mormónsbók, 3. Nefí 11:21–27). 15. maí 1829 báðust þeir báðir fyrir til að fá frekari leiðsögn um skírn. Þeir voru bænheyrðir er sendiboði frá himni birtist þeim. Sá sendiboði var Jóhannes skírari, sem við þetta tækifæri veitti þeim Aronsprestdæmið, er veitir valdsumboð til að boða fagnaðarerindi iðrunar og að skíra. Að þessu loknu skírðu Joseph og Oliver hvor annan í Susquehanna-ánni sem var nærri. Atburður þessi var boðberi endurreisnar prestdæmisins, sem tekið hafði verið af jörðu með fráhvarfinu. 

Þýðing Mormónsbókar

Í september árið 1823 var Joseph Smith vitjað af sendiboða himins að nafni Moróní, á sama hátt og oft átti sér stað hjá forsvarsmönnum kirkjunnar í Nýja testamentinu (sjá einkum Postulasöguna). Sendiboðinn greindi honum frá því að Guð ætlaði honum ákveðið hlutverk. Moróní greindi Joseph frá heimildum um forna íbúa Ameríku, sem grafnar væru í jörðu í nálægri hæð og hefðu að geyma fyllingu fagnðarerindis Jesú Krists.

Í september árið 1828 fékk Joseph heimildirnar í hendur, sem skráðar voru á gulltöflur. Við vitum nú að ekki var óalgengt að fólk í Ameríku til forna skráði heimildir á málmplötur. Joseph Smith þýddi heimildirnar yfir á ensku með guðlegum innblæstri. Þýðingarritið ber nafnið Mormónsbók - Annað vitnu um Jesú Krist. Það var nefnt eftir Mormón, sem var forn spámaður er tók saman þessar helgu heimildir. Bókin staðfestir, sem annað vitni um Jesú Krist, að Jesús Kristur lifir í raun og var í eðli sínu guðlegur. Hún ber einnig vitni um að Biblían er sönn.

Mormónsbók var fyrst gefin út árið 1830. Hún hefur allt frá þeirri stundu orðið fleiri milljónum manna til blessunar, sem á rætur að rekja til hins kraftmikla boðskapar um Jesú Krist og fagnaðarerindi hans.

Hér er hægt að panta eintak af Mormónsbók endurgjaldslaust.