Kirkjan á Spáni í 40 ár

Borgin Avila, sem er staðsett 112 km norðvestur af Madrid, er ennþá algjörlega umkringd veggjum þótt þeir séu ekki lengur notaðir sem virki eins og upprunalegur tilgangur þeirra var.

Öldungur Marion G. Romney úr Tólfpostulasveitinni, þriðji frá hægri, vígir Spán fyrir boðun fagnaðarerindisins þann 20. maí 1969.

Árið 2009 verður uppfullt af þýðingarmiklum þáttaskilum fyrir kirkjuna á Spáni.  Nú eru liðin rétt liðlega tíu ár síðan Madrid Spánar musterið var vígt og í maí munu Síðari daga heilagir á Spáni halda upp á 40 ára afmæli vígslu lands síns fyrir boðun fagnaðarerindisins.

Þegar árið 1967 rann upp var trúfrelsi á Spáni einungis draumur sem vænst var eftir einhvers staðar við sjóndeildarhringinn. Í júní þetta sama ár voru hins vegar sett lög sem loksins gerðu trúfrelsið að veruleika.  Kirkjan var samþykkt af spænsku ríkisstjórninni þegar hún formlega skráði sig hjá dómsmálaráðuneytinu þann 22. október 1968.

Þann 20. maí 1969 fór öldungur Marion G. Romney – sem á þeim tíma var í Tólfpostulasveitinni – ásamt nokkrum staðarleiðtogum upp á skógivaxna hæð þar sem sést vel yfir Madrid.  Þar vígði öldungur Romney Spán fyrir boðun fagnaðarerindisins.  Í vígslubæninni sagði hann að vígsludagurinn væri „stórkostulegur dagur og opnun nýs tímabils á Spáni sem gerði hlutum kleift að gerast sem annars gætu ómögulega átt sér stað án blessana fagnaðarerindisins“ (sjá Church News, 14. júní, 1969).

Þótt að atburðirnir á þessum eftirminnilega degi þýddu að SDH trúboðar gætu opinberlega farið til Spánar þá varð vöxtur kirkjunnar þar í landi fyrst í stað mjög hægur og erfiður.

„Eftir að lögin um trúfrelsið voru sett byrjuðu trúboðarnir að fara til Spánar,“ sagði öldungur Faustino Lopez, framkvæmdastjóri menntunardeildar kirkjunnar á Spáni og svæðisvaldshafi sjötíu.  „En það voru margar hindranir í byrjun vegna þess að margt fólk skildi ekki að það væri trúfrelsi eða það væru aðrar kristnar kirkjur fyrir utan kaþólsku kirkjuna.“

En kirkjan fór sannarlega að vaxa á Spáni.  Þegar vígslubæn öldungs Romneys var gefið voru einungis 335 kirkjuþegnar búsettir á Spáni – flestir þeirra voru bandarískir hermenn og fjölskyldur þeirra.  Í dag eru hins vegar 42.873 kirkjuþegnar búsettir á Spáni.  Þeir eru dreifðir yfir svæði sem í eru fimm trúboð, níu stikur, níu umdæmi og samtals 133 deildir og greinar.  Madrid Spánar musterið var vígt 19. –21. mars, 1999.

Garth Wakefield er mjög hæfur til að veita innsýn í þróun kirkjunnar á Spáni.  Hann ásamt eiginkonu sinni, Kay Lynn, hefur þjónað sem trúboðsforseti Spánar Bilboa trúboðsins frá árinu 1987-1990 og forseti Spánar Madrid trúboðsskólans frá 2005-2008.

„Þegar við byrjuðum í Bilboa fyrir 20 árum þá voru einungis 1.248 kirkjuþegnar í öllu trúboðinu sem þakti allan norðanverðan Spán,“ segir hann.  „Nú eru áætlanir um að gera stiku fyrir einungis þetta sama norðursvæði.  Þannig að framþróun á sér stað.

„Spænsku kirkjuþegnarnir hafa tilhneigingu til að halda fast í fagnaðarerindið.  Til dæmis get ég farið til baka og hitt gamla vini sem voru með okkur í norðri og þeir eru enn virkir.  Þetta vekur mér aðdáun.
„Þar eru kirkjuþegnar sem fara reglulega og staðfastlega í musterið og nú er þriðja kynslóð kirkjuþegna komin á legg.“

Öldungur Lopez fer í fylkingu fyrir yfirstandandi vinnu við að halda upp á 40 ára afmæli vígslu Spánar fyrir boðun fagnaðarerindisins.  Hann kennir trúarskóla eldri bekkjar þar sem námsefnið er eingöngu tekið úr sögu kirkjunnar á Spáni, stendur fyrir átta kvöldvökum í Madrid stikunni um sögu kirkjunnar á Spáni og er að ljúka við bók sem fjallar um upphaf kirkjunnar á Spáni sem koma mun út síðar á þessu ári og mun hafa að geyma efni úr skjalasafni kirkjunnar sem og frásagnir fyrrverandi trúboða sem voru kallaðir til Spánar.

Hápunktur hátíðarinnar verður í Madrid í maí, sama mánuði og öldungur Romney flutti vígslubænina fyrir fjórum áratugum.

„Við ætlum að bjóða mörgum á hátíðina, kirkjuþegnum sem og fólki utan kirkjunnar,“ sagði öldungur Lopez. „Þar á meðal eru minna virkir kirkjuþegnar og ungu kirkjuþegnarnir svo þeir megi vita um fórnirnar sem kirkjuþegnar fyrr á tímum þurftu að færa.“

Spánn er að sjálfsögðu heimili Kristófers Kólumbus, landkönnuðarins sem fann ameríska meginlandið árið 1492.  Í Mormónsbók spáir meira að segja Nefí fyrir um Kólumbus, að hann myndi halda „yfir vötnin mörgu, já, til niðja bræðra minna, sem voru í fyrirheitna landinu“ (1. Ne 13:12).

Tengslin milli Kólumbusar og Spánar glötuðust ekki hjá öldungi Romney né Gordon B. Hinckley forseta, báðir nefndu Kólumbus í vígslubænunum sem sagðar voru á spænskri grund – hinn fyrri árið 1969 í bæn til að opna Spán fyrir boðun fagnaðarerindisins og sá síðari við vígslu Madrid Spánar musterisins árið 1999.
Church News segir að öldungur Romney hafi í vígslubæn sinni „minnst á að fundur Kólumbusar á nýja heiminum greiddi fyrir endurreisn fagnaðarerindisins.  Hann minntist einnig á að það var spáð fyrir um 400 árum fyrir Krist að slík uppgvötun myndi flýta fyrir endurreisn kirkju Krists um alla jörð.“
Í musterisvígslubæninni sem Hinckley forseti flutti í mars 1999 sagði hann: “Við minnumst að það var frá þessum ströndum sem Kólumbus sigldi og uppgvötaði Ameríku eins og sagt er fyrir um í Mormónsbók.“
Þrátt fyrir að lög Spánar hafi tiltölulega nýlega opnað öðrum trúfélögum dyrnar þá var fyrsti kirkjuþegninn á Spáni í raun skírður fyrir 135 árum síðan.

Meliton Gonzalez Trejo fæddist í Garganta la Olla, Spáni árið 1844.  Þegar bróðir Trejo var í spánska hernum að þjóna í Frakklandi las hann bækling um kirkjuna sem hann fékk frá SDH trúboða.  Áhugi hans vaknaði strax og eftir innblásinn draum fluttist hann búferlum til Utah árið 1874 og gekk í kirkjuna.  Á sínum tíma ritaði hann fyrstu tvær þýðingar Mormónsbókar yfir á spænsku.

Bróðir Trejo, sem lést árið 1917 í Arizona, hefur ennþá, nú nærri öld eftir andlát sitt, áhrif á viðurvist kirkjunnar í heimalandi sínum.  George R. Ryskamp, prófessor í sögu í Brigham Young háskólanum (BYU) kynntist heimabæ bróður Trejo, Garganta la Olla, er hann vann ættfræðirannsóknir á fjölskyldu Trejo.  Ryskamp prófessor stýrir nú rannsókn sem hann lýsir sem „tilraun til að sýna konur í strjálbýlum spænskum bæjarfélögum í nýju ljósi.“  Valdi hann Garganta la Olla sem miðpunkt rannsóknarinnar.  Í vor mun Ryskamp prófessor fara með hóp BYU nema í rannsóknarleiðangur til Garganta la Olla í þriðja skiptið á fimm árum.